Þrátt fyrir þá dæmalausu tíma sem við nú göngum í gegnum, hefur verkefnastaða Slippsins á
Akureyri verið viðunandi. Starfsmenn fyrirtækisins hafa unnið hörðum höndum í þeim verkefnum
sem við höfum tekið að okkur. Á meðal þessara verkefna eru stór verkefni fyrir erlendar útgerðir.

Snemma á þessu ári lauk stórri slipptöku á frystitogaranum Reval Viking fyrir eistneska
útgerðarfyrirtækið Reval Seafood. Þar var unnið í stálviðgerð á stefni skipsins auk þess sem nýir tog-gálgar voru smíðaðir þ.a. skipið getur nú dregið fjögur troll. Einnig var unnið að skrúfuviðgerðum, breytingum á rækjulínu á vinnsludekki auk þess sem síður og botn skipsins voru máluð.

Gunnar Tryggvason verkefnastjóri hjá Slippnum á Akureyri var ánægður með verkið.

“Þetta verkefni var krefjandi en tókst vel. Starfsmenn Slippsins stóðu sig gríðarlega vel og sú
fjölbreytta þjónusta sem við getum boðið gefur okkur ákveðið forskot á aðra og kemur þannig
viðskiptavinum okkar til góða. Samstarfið við útgerðina gekk einnig mjög vel sem er ekki síður
mikilvægt í svona verkefni”.

Auk þessa lauk nýlega stórri viðgerð á togaranum Melkart 5 sem er í eigu rússnesku útgerðarinnar
Murman Seafood. Skipið var almálað og öxuldregið auk þess sem aðalvél var tekin upp og breytingar á vinnsludekki skipsins framkvæmdar. Slippurinn Akureyri og Murman Seafood hafa átt gríðarlega gott samstarf á liðnum árum en auk viðhaldsverkefna á skipum félagsins afhenti Slippurinn vinnslubúnað í nýja fiskvinnslu fyrirtækisins í Rússlandi á s.l. ári.