„Uppsjávarskipin eru okkar ljúfi vorboði“

Töluverð umferð skipa hefur verið til okkar í Slippnum Akureyri undanfarin misseri. Snemma í síðasta mánuði voru sjö skip af öllum stærðum og gerðum samtímis hjá Slippum í ýmiskonar þjónustu.

Uppsjávarskipið Jóna Eðvalds SF frá Hornafirði var í slipp í tæpar þrjár vikur þar sem skipið var heilmálað, hliðarskrúfa tekin upp, skipið öxuldregið og viðgerðir framkvæmdar á stýrisbúnaði.

Uppsjávarskip eru algeng sjón í Slippnum snemmsumars. Eftir loðnuvertíð og í mörgum tilvikum nokkra vikna kolmunnaúthald, eru vikurnar fram að makrílvertíð nýttar til viðhalds og endurbóta. Þessi tími er því oft fjörlegur hér í Slippnum og nauðsynlegt að nýta tímann til hins ítrasta. Í kjölfar Jónu Eðvalds komu svo Sigurður VE auk Bjarna Ólafssonar AK og er nú verið að vinna í báðum þessum skipum. Í kjölfar sjómannadagsins fara uppsjávarskipin svo að streyma eitt af öðru til makrílveiða.

Plötuskipti og heilmáling fóru fram á dýpkunarskipinu Pétri Mikla og gröfuprammanum Reyni sem eru í eigu Björgunar ehf. Viðgerðir voru unnar á skrúfu og stýrisbúnaði á Nøtte sem er þjónustubátur Laxa ehf.

Frystiskipið Sólberg ÓF sem er í eigu Ramma hf. var í flotkvínni þar sem botn var málaður sem og síður og frystilest. Breytingar voru gerðar á stýrisbúnaði sem er engin smásmíði ásamt öðrum minni viðhaldsverkefnum. Ragnar Aðalsteinsson útgerðarstjóri Ramma var ánægður með verkið.

„Það er óneitanlega mikill kostur að geta tekið svona stórt skip á þurrt nálægt heimabyggð og fengið alla almenna þjónustu. Þær breytingar sem voru gerðar tókust vel og kláraði Slippurinn verkið á tilsettum tíma sem var okkur mjög mikilvægt“.

Erlendu frystiskipin Polonus og Angunnguaq II hafa verið hjá Slippnum Akureyri í töluverðan tíma og er áætlað að þau haldi til veiða á næstu vikum.

Það má því segja að það sé líf og fjör á athafnasvæði Slippsins og er fyrirliggjandi að það haldi áfram á komandi mánuðum.

Við leitum að metnaðarfullum, öflugum einstakling til að leiða þjónustu- og skipaviðgerðarsvið Slippsins Akureyri ehf.

Í seinasta mánuði lauk Slippurinn Akureyri uppsetningu á nýju lestarkerfi í Björgu EA 7, ferskfisktogara í eigu Samherja. Kerfið byggir á því að tómum kerjum er lyft á sjálfvirkan hátt úr magasíni í lest og upp á vinnsluþilfar þar sem kerunin fer fram. Full ker af vinnsluþilfari eru síðan send með lyftu niður í lest, þar sem kerastæðum er safnað saman í magasíni sem rúmar allt að 35 ker. Lestarkerfið byggir að mestu á lestarkerfinu sem Slippurinn hannaði og smíðaði í Kaldbak EA 1 sem reynst hefur í alla staði mjög vel.

Kjartan Vilbergsson yfirvélstjóri á Björgu er ángæður með nýja lestarkerfið.

„ Lestarkerfið bætir alla vinnuaðstöðu fyrir hásetana en það bæði auðveldar okkur vinnuna og eykur öryggi til muna. Það er mikill kostur að kerfið er einfalt og skilvirkt. Við fórum með kerfið nýtt út í brælutúr og það gekk hnökralaust“ segir Kjartan í spjalli við heimasíðuna.

Á meðan að uppsetningu lestarkerfisins stóð sinntu starfsmenn Slippsins öllu almennu viðhaldi á skipinu. Sett var upp krapakerfi í skipinu og gerðar minni háttar breytingar fremst á vinnsluþilfari til að aðlaga vinslubúnaðinn nýja lestarkerfinu og kerunaraðstöðunni. Skipið var jafnframt tekið upp í flotkví, það málað og aðalvél tekin upp.

Verkefni sem þessi, þ.e.a.s. þar sem saman fer almennt viðhald og breytingar á fiskiskipi auk endurnýjunar á vinnslubúnaði þess, eru að verða æ algengari hjá okkur í Slippnum enda búa starfsmenn fyrirtækisins yfir mikilli reynslu og þekkingu á þessu sviði.

Seint í desember kom frystitogarinn Blængur NK125 sem er í eigu Síldarvinnslunnar til viðhalds Í
Slippnum. Meðal verkefna í þessu stoppi var almálning á skipinu, þ.e.a.s. málning á yfirbyggingu,
þilförum, síðum og botni. Veltitankur var smíðaður á skipið og var hann settur upp ásamt tengingum
og tilheyrandi stjórnbúnaði. Afgasketill var hreinsaður, ýmis innréttingarvinna í matsal og
vistarverum skipverja var framkvæmd auk þess sem búnaður á vinnsluþilfari var yfirfarinn og önnurhefðbundin viðhaldsverkefni kláruð.

Að sögn Ólafs Ormssonar sviðsstjóra skipaþjónustu Slippsins gekk verkefnið vel í alla staði og eiga
starfsmenn Slippsins hrós skilið fyrir gott starf. Það er augljóst að vilji útgerðarinnar er að halda
skipinu vel við, sést það best á útliti og ástandi búnaðar skipsins.

Grænlenska línuskipið Masilik sem er í eigu Royal Greeland er farið á veiðar eftir að hafa verið í slipp
allan janúar mánuð. Í skipinu var unnið við endurbætur á klæðningum á vinnsludekki og það
heilmálað. Skipið var jafnframt öxuldregið, unnið að ýmsum viðhaldsverkum í vélarrúmi auk þess
sem akkerishús var lagfært eftir að skipið fékk á sig brot fyrir skemmstu.

„Björg EA 7 er komin til okkar og verður hjá okkur fram í miðjan mars mánuð í reglubundnu viðhaldi
auk þess sem nýr lestarbúnaður frá Slippnum verður settur í skipið. Grænlenski togarinn
Angunnguaq II kemur í næstu viku en Slippurinn sér um að setja nýja aðalvél í skipið, endurnýja gír
og margskonar vélbúnað í vélarrúmi skipsins. Verkefnastaðan er góð hjá okkur eins og er en þó er
svigrúm til að bæta við verkefnum” segir Ólafur Ormsson í spjalli við heimasíðuna.